Wird glade …

Under Höchschtiisatz.

Das mir öis für d’Gsellschaft starch mached, isch für öis sälbverständlich. Mit uusgwäälte Sponsoringengagements understützed mir langfrischtigi Projäkt. Zum Biischpiil die:

brain-truck

   

Straassevercheersumfäll chönd schwerwiegendi Hirnverletzige hinderlaa. Im brain-truck, eme 16 Meeter lange Laschtwageuufliger mit Zältaabau, mached Experte die Thematik erläbbar. Mir steled s’Zugfaarzüüg vom brain-truck zur Verfüegig. Mee uf: brain-truck.ch

 

Eco-Drive

   

De Veräin Quality Alliance Eco-Drive isch im Jaar 2000 gründet worde. Er will dur wirtschaftlichs Faare de Triibschtoffverbruuch und de CO2-Uusschtoss sänke und mit de Förderig vomene partnerschaftliche Faarschtiil d’Vercheerssicherhäit schtäigere. Öisi Umwält liit öis ebefalls am Herz. Drum simmer siit 2010 als zertifizierte Uusbilder vo Eco-Dräiv underwägs und underschtützed di aktuell Kampanie «Klever Faare». Mee uf: ecodrive.ch

 

FC Dietike

   

De Fuessballklub Dietike isch 1908 gründet worde. Mit rund 900 Mitglider und 300 bis 350 Juniorinne und Juniore isch er de gröschti Sportveräin im Ruum Limattaal. Planzer unterschtützt de FCD, damit di erschti Mannschaft i de erschte Liiga au in Zuekunft uf en äigene Nachwuchs cha zelle. Mee uf: fcd.ch

 

HCDU

   

Mit über 200 Mitglider isch de Handballklub Dietike-Uurdorf äine vo de gröschte Sportveräin im Limattaal. De HCDU isch «Cool & Clean Member»; das häisst, er setzt sich aktiv für en alkohol-, nikotin- und drogefreie Sport ii. D’Jugend isch öisi Zuekunft – drum unterschtützed mir de Klub als Hauptschponsor. Mee uf: hcdu.ch

 

Nez Rouge

   

I de Wienachtsziit büütet Nez Rouge mit eme Netz vo Freiwilige en Taxidienscht aa, dass de Alkohol nöd au am Stüür iischlaat. Siit 2010 understützed mir de Verein finanziell und bewerbed sin wertvolle Serwiss uf öisne Laschtwagehecks. Mee uf: nezrouge.ch

 

Schweizer Tafel

   

Ganz nach em Motto "Ässe verteile statt wägwerfe", sammlet d'Schwiizer Taflä bi Produzäntä, Grossverteilär und Detaillischtä fascht achtzää Tonnä Lebensmittel pro Tag ii. Diä werdet gratis a soziali Institutionä verteilt. Mir unterstützed d'Schwiizer Taflä in Form vo Transporte. Mee uf: schweizertafel.ch

 

Seniorenbühne Zürich

   

D’Zürcher Seniorebüüne gits siit 1975 und isch die eltischt vo dere Sorte. Rund 60 Mal pro Jaar trätted theaterbegäischtereti Fraue und Manne mit eme nöie Schtuck uuf. D’Seniorebüüne git irne Mitglider d’Glägehäit für e sinnvolli Freiziitgschtaltig und gueti Unterhaltig im Chräis vo Gliichgsinnte. Die spiled vor allem a Aaläss i Alters- und Pflägzäntre und a Altersnamittäg. Planzer underschtützt das schöne Projäkt siit 2014. Mee uf: seniorenbuehne.ch

   

Tischlein deck dich

   

D‘Organisation «Tischlein deck dich» rettet iiwandfreii Läbesmittel vor de Vernichtig und verteilt si a armi Mänsche i de ganze Schwiiz. Dademit leischtet de Verein en sozial sinnvolle und ökologisch nachhaltige Biitrag zum reschpäktvolle Umgang mit Läbesmittel. Mir unterschtützed «Tischlein deck dich» mit Transpört. Mee uf: tischlein.ch

 

Umwelt Arena

   

S‘Ziil vo de 2012 eröffnete Uusschtelligsplattform Umwält Arena isch, s‘Schlüsselthema Nachhaltigkäit i verschidene Läbesberiich für Jung und Alt erläbbar und begriifbar z’mache. Die rund 100‘000 Bsuecher pro Jaar sölled zum nachhaltige Umgang mit Ressurse motiviert und über moderni Umwälttechnike informiert werde. D’Umwält Arena isch en Ort vom Wüsse, Lerne und Erfaarigsuustusch. Im April 2016 startet di nöi Uusschtellig «Mobilität». Mit dere möcht sich d’Umwält Arena zum fachlich kompetänte und füerende Zäntrum rund um das Thema mache. Mir händ mit de Umwält Arena e Partnerschaft abgschlosse, damit mir öisi Aktivitäte vor Ort chönd präsentiere. Mee uf: umweltarena.ch

 

Öbu

   

De Undernämensverband Öbu setzt sich fürs Waarnäh vo de ökonomische, ökologische und soziale Verantwortig im Wirtschaftsläbe ii. Mit mee als 130 Mitglider sind über 450‘000 Arbetsplätz in de Schwiiz verträtte. De Öbu schafft mit de Mitglider anere «Wirtschaft vo de Zuekunft», setzt sich für di nötige Raamebedingige ii und förderet e konkreti Umsetzig vo fortschrittliche Nachhaltigkäitsschtandards. Mir sind siit 2016 debii. Mee uf: oebu.ch