Was Si über öis sötted wüsse
A 62 Standort i de Schwiiz und a 22 im Usland, zum Bischpiil z Itaalie, Düütschland, Frankriich und Hongkong, beschäftigemer über 6'800 Mitarbäitendi. Drunder über 400 jungi Erwachseni, wo bi öis iri Bruefsleer mached.
Öisne Bisness-tu-Bisness-Chunde büütemer erschtklassigi Transport- und Laagerlogischtikdienschtläischtige und e Vilfalt a chundenorientiärte Gsamtlöösige– under anderem als 4PL-Aabüüter im Beräich Suppläi Tschein Mänäntschment. Bi Dienschtläischtige mit Privaatempfänger (Bisness-tu-Konsuumer) trägemer s’elegante Gründerlogo, zum Bischpiil bi Planzer Paket, Planzer Homeservice oder bi Farmatranspört nach GDP-Läitlinie.
Mit regionaal verankerete Gsellschafte und mit eme dichte Partnernetzwerch simer wiit über öisi Landesgränze uus täätig. Dadebii wicklemer siit Jaare 60% vo de Transpört uf de emissioonsarme Schine und 40% übers Straassenetz ab. Im Beräich Laagerlogischtik hämmer 2018 gägenüber em Voorjaar 20,6% CO2-Emissioone pro verarbäitets Kilo iigschpaart – es hööchscht erfröilichs Resultaat, wi mer mäined. Da erfaared Si mee übers Theema Naachhaltigkäit.
Planzer in Zaale
1936
Gründig Äinzelfirma
1966
Akziägsellschaft in Familiähand
Modal Split
60% Schinä, 40% Strass
84
Standort, devoo 22 im Usland
240
Baanwage jedi Nacht
1'060
liechti Faarzüüg, devoo 60 Subundernämer
1'130
schwäri Faarzüüg, devoo 270 Subundernämer
1'459'000 m2
Laagerflächi
14
Hochregallaager für 185'100 Palett
Mitarbäitendi
6'800
Mänsche
400
Lernendi
98
Nazioone
22%
über 50-Jäärigi
Das isch öisi Gschäftsläitig
Nils Planzer
De Nils (1971) schtartet als LKW-Mechaaniker und bildet sich i verschidene Beräich wiiter. 1997 stiigt er is Familiänundernäme ii. Sächs Jaar spööter übergit em sin Vatter Bruno s’Schtüür als CEO. Siit 2007 presidiärt er de Verwaltigsraat vo Planzer. De Nils hät gern diräkti Wääg, muetigi Entschäidige, erfrischendi Begägnige, Mänsche mit Fröid am Schaffe, Sport, feins Ässe, d’Berge und s’Meer.
Severin Baer
De Severin (1985) isch glernte LKW-Mechaaniker und eignet sich wiiteri Brüef aa, zum Bischpiil de Technisch Chaufmaa. 2005 läit er im Familiänundernäme loos. Er sitzt i de Gschäftsläitig, im Akzionariaat und im Verwaltigsraat vo Planzer. De Severin verantwortet s’nazionaale Transportbisness. Er setzt uf Passioon, Fliiss und Eerlichkäit. Graadlinigi Mänsche schetzt er bsunders. Privaat verbringt de Severin gern Ziit mit sinere Familiä oder uf Schii ituure.
Marius Buhl
De Marius (1973) macht d’Matuur und es Betriibswirtschaftsschtudium. Siit 2019 ghört er zur Planzer-Gschäftsläitig und zäichnet für Finanze und Kontrolling verantwortlich. Im sind Transparänz, Verlässlichkäit, Flexibilitäät, offni Komunikazioon und Zuelose wichtig. Und es gsunds Pflichtbewusstsii. Sini privaate Stunde teilt de Marius mit Familiä, Jangtäimers, Technik und Musig.
Sandro Knecht
De Sandro (1966) isch glernte Schpedizioonskaufmaa. Als Füerigschraft i globaale Logischtikundernäme sammlet er vili Jaar Erfaarig, under anderem i de USA, Irland und Groossbritannie. En Maaster i Betriibsökonomii rundet sin bruefliche Werdegang ab. Em Sandro sind innovatiivs Dänke, Tiimgäischt und es fortschrittlichs Umfäld wichtig. Sis Motto: Vo Fäler lerne und Erfolg fiire. De Herzbluet-Zürcher hät e Voorliebi für Wältgeschee, Räise, fäins Ässe, guete Wii und eerlichi Mänsche.
Patrik Meier
De Patrik (1973) macht e käufmännischi Leer, dänn es hööchers Wirtschaftsdiploom und nimmt aktuell am Ädväänsst Mänätschment Programm täil. 1999 läit er bi Planzer loos und übernimmt im Juli 2021 de Schtaab als Läiter Logischtik und Mitgliid vo de Gschäftsläitig. Bsunders am Herz ligged em Aaschtand, Reschpäkt, Fäärness und Eerlichkäit. Sini Batterie ladt de Patrik bim Tschogge, Schiifaare, Räise und mit sinere Familiä uuf.
Hansjörg Rupp
De Hansjörg (1975) hät de Bruef vom Automechaaniker glernt und isch spöter Automobiilchaufmaa worde. 2006 isch er als Filialleiter i dä Planzer-Garagebetriib in Kallnach iträte und hät spöter d’Leitig vo dä gsamtä Technik übernoh. Hüt isch er Mitgliid vo dä Gschäftsleitig und füert dä Planzer-Support-Stab (zentraali Dienscht). Zudäm treit er d’Verantwortig für d’Bereich Complaiäns und Dateschutz. Für ihn sind Ehrlichkeit, Loyalität, Fliiss und Authentizität vo grosse Bedüütig. Er schetzt gsunds Sälbschtbewusstsii, soziali Kompetänz, Vertraue, Abwächslig und es tolls Team. Sini Energie tankt er i de Berge bim Velofaare, Tschogge oder Langlaufe.
Hansruedi Vogel
De Hansruedi (1980) schtartet als Elektromontöör und bildet sich i verschidene Beräich wiiter, am Schluss zum Maaster i Prozäss- und Logischtik-Mänätschment. 2006 wächslet er zu Planzer. Siit 2021 läitet er de Support. De Hansruedi isch offe für Nöis. Eerlichkäit und Pünktlichkäit setzt er für en erfolgriichi Zämearbet voruus. Sini freie Stunde verbringt er am liebschte mit Bäike, uf em Fuessballplatz, bim Pokere oder als Hobichoch.
Si ghööred zu öisere erwiitertä Gschäftsläitig
Philipp Bättig
De Philipp (1973) lernt Tüüfbouzäichner und schlüüsst es paar Jaar spööter als Bouinscheniöör ab. 2005 schtartet er bi Planzer. Hüt läitet er gmeinsam mit em Lukas Ricklin de Beräich Immobiiliä und schtaat de Düütschschwiiz vor. Dänn isch er auno Mitgliid vo de Aalaagekommission vo de Planzer-Personaalvoorsorgeschtiftig. De begäischtereti Tschogger und Kunschtliäbhaber läit Wert uf sälbschtändigs und sachbezoges Schaffe und schetzt s’familiääre Umfäld vo Planzer.
Helen Mazza
D’Helen (1988) isch glernti Logischtikerin und siit 2012 bi Planzer. Mit Wiiterbildige im HR und im betriebswirtschaftlichä Beriich hät sii sich kontinuierlich wiiterentwicklet und übernimmt im 2025i d’Leitig HR. Sii schätzt Pragmatismus, Bodäständigkeit und Kolleginne und Kollege, wo apacked und gmeinsam öppis bewege wänd. Privat liebt sii dusse z’si – am liebstä ide Berge oder bim Fische.
Jan Pfenninger
De Jan (1987) absolviärt e kaufmännischi Leer und spööter en Bätscheler i Betriibsökonomii. Bi Planzer isch er siit 2002. 2015 übernimmt er d’Läitig vo Marketing & Komunikazioon und sitzt siit 2019 i de erwiiterete Gschäftsläitig. De Jan rüttlet, läischtet und kommuniziärt mit em gewoonte Planzer-Fliiss. De familiäär Umgang und Begägnige uf Augehööchi sind sis Ding. Sis Privaatläbe verbringt er am liebschte mit guetem Wii, nette Mänsche und bi de Produkzioon vo Musig.
Karin Purtschert
D‘Karin (1972) isch glernti kaufmännischi Aagschtellti und bildet sich dänn zur Fachfrau für Personaalvoorsorg wiiter. 2012 fangt si bi Planzer aa. Siit 2017 läitet si d’Pensioonskasse. Si schtaat für en moderne und kooperatiive Füerigsschtiil, schänkt Vertroue und überträit Verantwortig. Si schetzt de Fliiss, s’Mitenand und d’Arbetsfröid im Huus Planzer. Iri Stichwort fürs Privaatläbe luuted Familiä, Tschogge und Bergwandere.
Lukas Ricklin
De Lukas (1970) schlüüsst 1998 sis Architektuurschtudium ab und isch dänn als Architäkt und Projäktläiter im In- und Ussland täätig. Siit 2009 läitet er gmeinsam mit em Philipp Bättig d’Immobiiliäabtäilig vo Planzer und schtaat de Weschtschwiiz voor. 2015 wird er Mitgliid vo de erwiiterete Gschäftsläitig. Er schetzt de familiäär Umgang, s’Aapackertum und d’Entschäidigsfröid bi Planzer. I sinere Freiziit isch er gern am Räise und verbringt Ziit mit Familie und Fründe.
Christian Vagli
De Christian (1979) fangt sini Planzer Laufbahn im Jahr 2000 direkt nach de kaufmännische Berufslehr bei der Tochterfirma Quali-Night AG ah. Det hed er früh wertvolli Praxiserfahrig gsammlet und sich entwicklet. Parallel dezue hed hed er e betriebswirtschaftlichi Weiterbildig sowie e Vertüfig im internationale Logistikmanagement absolviert. Siit April 2026 isch er für de Verkauf verantwortlich und setzt sich däfür ih, Kundenbeziehigä und Partnerschaftä weiterzentwicklä. Bsunders schätzt er die familiäri Kultur vom Unternehme, die vo Vertraue, Teamgeist und emä langfristige Miteinander prägt isch. In sinere Freizit isch er sportbegeistert und stellt sich gern neuä sportliche Herusforderunge. Glichzitig gnüsst er das Familielebä sowie die Gesellschaft vo gute Fründe sehr.
Simon von Arx
De Simon (1988) hät e Leer als Laschtwagemechaaniker gmacht und sich dänn i de Beräich Uus-/Wiiterbildi und Liiderschipp aktiv wiiterbildet. 2016 hät er d’Filiaalläitig vo de Uusbildigszäntre in Dällike, Härkinge und Paantala übernoo. I sinere Freiziit isch de Simon gern uf em Wasser und hät deet s’Rueder als Faargaschtschiffskapitään fescht i de Hand. S’Mitenand isch für in zentraal – dänn am Ändi mached d’Mänsche de Underschiid.
Das isch öise Verwaltigsraat Planzer Holding
Nils Planzer
Severin Baer
Pascale Planzer
D‘Pascale (1969) macht d Matuur und bsuecht di Hööcher Pädagoogisch Leeraaschtalt. 2002 holt ihre Vatter Bruno sii in Verwaltigsraat, wo si de Blick vonere Usseschteehende und wiiblichi Intuizioon iibringt. Zurziit macht si en CAS für Verwaltigsrööt. D Pascale suecht i irne Mitmänsche s’Guete, setzt uf de Momänt und verlaat au gern emal iri Komfortzoone. Iri Seel laat si i de Natuur bambele, zum Bischpiil am Berg oder uf em Golfplatz.
Alessandro Celli
De Alessandro (1962) studiärt Juura und wird Partner bi Beiker McKänsii. Siit 2011 sitzt er im Verwaltigsraat vo Planzer. Da konzentriärt er sich uf rächtlichi Sache, Kompläiens und Risikobeurtäilige. Zu sine Chernwert ghööred Liideschaft, Muet, Optimismus, Äigeschtändigkäit und Vertroue. Sini Batterie ladt de Alessandro bim Velofaare, Pilaates, Läse und mit Architektuur uuf.
Thomas Nieszner
De Thomas (1956) macht e kaufmännischi Leer und holt sich a de Colambia Juniwörsiti Niuu Jork en MBA. 2015 wird er Verwaltigsraatsmitgliid vo Planzer. Als Vollbluetschpeditöör verantwortet er da ales, was mit em nazionaale und internazionaale Logischtikbisness z’tue hät. De Thomas bevoorzugt Mänsche, wo eerlich, reschpäktvoll und tolerant sind. Sini freie Stunde widmet er de Schii- und Langlaufpischte, em Wandere und sine Änkelchind.
Linus Sulzer
De Linus (1963) lärnt Hochbouzäichner und schlüüsst dänn es Architektuurschtudium ab. 2009 tritt er em Verwaltigsraat vo Planzer bii. Da isch er zueschtändig für sämtlichi Boutheeme. De Linus schätzt bsunders Mänsche, wo mit offne Charte spiled. Er glaubt a Taatchraft, Äigeverantwortig und a d’Gsetz vom Handle. I sinere Freiziit isch er uf em Griin oder uf Räise.
Gerard van Kesteren
De Gerard (1949) stuidiärt Betriibsönonomii und wird Wirtschaftsprüefer. Er bekläidet diversi VR-Mandaat und gründet d’van Kesteren Faundeischen. 2015 chunt er in Verwaltigsraat vo Planzer. Da verantwortet er ales rund um d’Strategii und d’Finanze. Zfridehäit und Woolschtand z’täile hät für de Gerard Prioritäät. Sini freie Stunde widmet er de Natuur und sinere Stiftig.
Das isch öise Verwaltigsraat Planzer Transport
Nils Planzer
Severin Baer
Roland Eberle
De Roland (1953) studiärt Agraarökonomii a de ETH. Nach 10 Jaar a de Spitze vom Tuurgauer Buureverband und 12 Jaar als Tuurgauer Regierigsraat wächslet er i d’Privaatwirtschaft.
Siit 2017 sitzt er im VR vo de Planzer Transport AG. Für de Roland staat de Mänsch im Zäntrum vo jedem undernähmerische Würke. Drum isch er bim Familiäbetriib Planzer genau richtig. D’Batteriie lat er uf sinere BMW R1200C, mit de Familiä und mit Fründe uuf.
Peter Schütz
De Peter (1959) isch glärtne Elektromontöör, studiärte Betriibswirt und Entreprenöör. De Inhaber vo de Letrona AG sitzt i diverse Verwaltigsrööt, siit 2016 bi de Planzer Transport AG. Undernähmergäischt isch für de Peter gliichziitig e Fähigkeit und e Dänkhaltig. So bewiist er au bim Treilrunning, Schiifaare, Langlaufe und Wandere ziilschtrebigi Usduur. Under em Motto «guete Wii mues sii» pflägt de beräisti Wiiconessöör Fründschafte und Beziäige.
Mir frööged, Nils Planzer antwortet
Du staasch mit dim Name für es Schwiizer Familiäundernäme inere bewegende Bransche. Was isch dir da bsunders wichtig?
Sit min Grossvatter Max Planzer öises Familiäundernäme gründet hät, liit öis äi Äigeschaft bsunders am Herze: Fliiss. Ich persönlich möcht, dass mer de nächschte Generazioon e gsundi und erfolgriichi Baasis übergänd. Dadezue bruuchts nüd nur wirtschaftliche Erfolg, sondern e intakti und gläbti Undernämeskultuur. Das isch öis enorm wichtig.
Naachhaltigkäit isch es Schlüsseltheema bi Planzer. Was verschtaasch du drunder? Und werum isch das Theema zentraal?
Naachhaltigkäit ghöört zur DNA vomene gsunde Familiäundernäme. Das liit i de Natuur vo de Sach, dänn Familiäundernäme dänked i Generazioone. Das langfrischtige Dänke underscheidet sich vo de churzfrischtige Gwünnmaximierig bi börsekotierte Undernäme. Wichtig sind Taate, nüd Wort.
Wo staat Planzer i 30 Jaar?
Ich wünsch mir, dass mir öis wirtschaftlich und kulturell wiiterhin positiv entwickled und öisi Wert biibhalted. Und dass au di nächschti und übernächschti Generazioon mit Erfolg, Fliiss und Fröid a der Arbet für Planzer tätig isch und d’Bedürfnis vo de Chunde im Mittelpunkt stönd. Uf dem Wäg werdemer öis nachhaltig us de Schwiiz use i ali Himmelsrichtige entwickle – mit globale Schnittschtelle un enere regionaale Verankerig. De Mänsch isch dadebii immer im Mittelpunkt.
